သိကောင်းစရာ ဓူတင်သာသနာ အပိုင်း (၆)

 သိကောင်းစရာ ဓူတင်သာသနာ

အပိုင်း (၆)

သာမဏေနှင့် လူတို့အတွက် ဓူတင်

*************

{=MA ဦးဇင်း

=ဆရာတော်}

-ရဟန်းများက ဓူတင် ၁၃ပါးဆောင်ခွင့်ရှိတာကို သိရပါပြီ ဘုရား။ရှင်သာမဏေတွေလည်း ဓူတင် ၁၃ပါး ကျင့်ချင်ရင် ကျင်ခွင့်ရှိပါသလား ဘုရား

-ရဟန်းတော်များအတွက် ဘုရားရှင်ခွင့်ပြုတော်မူထားတဲ့ နှစ်ထပ်သင်္ကန်းကို သာမဏေတွေက သုံးခွင့်မရှိပါဘူး။ဒါ့ကြောင့် ဓူတင် ၁၃ပါးထဲက တိစီဝရိက်မှတစ်ပါး ကျန်တဲ့ဓူတင် ၁၂ပါးကို တန်းတူကျင့်ခွင့် ရှိပါတယ်။

-ကိုရင်လေးကနေ အသက် ၂၀ပြည့်လို့ ရဟန်းဖြစ်လာရင်တော့ ဓူတင်အားလုံး အပြည့်ဆောင်နိုင်ပြီလာာ ဘုရား။

-ရဟန်းဖြစ်ရင် အားလုံးဆောင်နိုင်ပါပြီ။

-လူတွေလည်း ဓူတင်ကျင့်လို့ရတယ်လို့ ဖတ်ဖူးပါတယ်ဘုရား။သူတို့က ဘယ်နှစ်ပါး ကျင့်နိုင်တာလဲ ဘုရား။

-လူဒကာ၊ ဒကာမတွေက တစ်နေ့တစ်ကြိမ်တည်းပဲ စားခွင့်ရှိတဲ့ ဧကာသနိက်ဓူတင်နှင့် တစ်ခွက်တည်း၊တစ်ထိုင်တည်းသာ စားခွင့်ရှိတဲ့ ပတ္တပိုဏ်ဓူတင်တို့ကို ဆောက်တည်နိုင်ကြပါတယ် ဦးဇင်း။

-လူက ဓူတင် ၁၃ပါးထဲက ၂ပါးပဲ

ကျင့်လို့ရတာပါလားဘုရား။

-ဟုတ်ပြီ။ဝိသုဒ္ဓိမဂ်ဆရာတော်ကတော့ လူတွေ ဓူတင် ၂ပါးပဲ ရတယ်လို့ ပြပါတယ်။သို့သော် လူတွေ ကျင့်လို့ ရတဲ့ဓူတင်ကို မစဥ်းစားဘဲ၊လူတွေ ကျင့်လို့မရတဲ့ဓူတင်ကို စဥ်းစားရင် ပံ့သကူဓူတင်နှင့် တိစီဝရိက်ဓူတင်ဆိုတဲ့ သင်္ကန်းနဲ့ဆိုင်တဲ့ဓူတင်နှစ်ပါးကို လူတွေ ကျင့်လို့ မရနိုင်ဘူး။ဆွမ်းဓူတင်ထဲက တချို့လည်း အခက်အခဲ ရှိနိုင်မယ်ထင်တယ်။ကျန်တဲ့ဓူတင်တွေထဲက လူတွေ ကြိုးစားကြံဆပြီးကျင့်ရင် ရနိုင်တာ အများကြီး ရှိနိုင်ပါတယ်။

-မှန်ပါ ဘုရား။

-ပမာပြရရင် သစ်ပင်အောက်မှာ နေရာရနိုင်တယ်။မိုးကောင်းကင်အောက် လွင်တီးခေါင်မှာ နေတာရနိုင်တယ်။သတ္တိကောင်းရင် လူခြေတိတ်ချိန်မှာ သုဿာန်ထဲ သွားနေတာ ရနိုင်သေးတယ်။တောအင်္ဂါပြည့်ပြည့်စုံစုံ ရတဲ့နေရာမှာ အရုဏ်တက်တဲ့အချိန်အထိ နေမယ်ဆိုရင်လည်း အာရညကင်ဓူတင်ရနိုင်တယ်လေ။ဓူတင်ကို ကျင့်နိုင်ရင် ကျင့်နိုင်သလောက် နောင်ဖြစ်လတ္တံ့သော ဘဝါဘဝအတွက် ဝါသနာထုံတဲ့ အကျိုးကိုရတာပါ ဦးဇင်း။

-ပံ့သကူ အဝတ်လည်း ကောက်ပြီးသုံးရင် ရနိုင်လောက်ပါတယ် ဘုရား။

-စွန်းလွန်းဆရာတော် အလောင်းအလျာ လူ့ဘဝတုန်းက တရားကို ပိုပြီး လွတ်လွတ်လပ်လပ် အားထုတ်ရအောင်လို့ ဘယ်အထိ ကြံစည်ခဲ့သလဲဆိုရင် `အဝတ်အတွက် ဂုံနီအိတ် တစ်လုံးကို လက်နှစ်ဖက် နေရာနှင့် ခေါင်းနေရာ အပေါက်ဖောက်ပြီး စွပ်ထားမယ်။စားစရာကို တောင်းရမ်းစားပြီး အရူး တစ်ယောက်လိုနေပြီး တရားအားထုတ်ရကောင်းမလား´ လို့ စဥ်းစားမိခဲ့သတဲ့ ဦးဇင်း။

-ဆရာတော် အလောင်းအလျာ အဝတ်နှင့် အစားကို ခြိုးခြံဖို့ ကြံစည်တော် မူတာပါလား ဘုရား။

-ဟုတ်တယ်။သူက ဓူတင်လို့ အမည်နာမ မတပ်ခဲ့ပါသော်လည်း ဓူတင်ရဲ့ ဂုဏ်ရည်ဖြစ်တဲ့ အလိုနည်းတဲ့ အပ္ပိစ္ဆတာဂုဏ်၊ရောင့်ရဲလွယ်တဲ့ သန္တုဋ္ဌိတာဂုဏ်တော့ ပေါ်လွင်ပါတယ်။သို့သော် ဓူတင်ကို လူလိုကျင့်ရင်တော့ လူလောက်ပဲ ကျင့်နိုင်မှာပါ ဦးဇင်း။

အရှင်ခေမာနန္ဒ

(ရန်ကင်းတောရ သပြေပင်)

*ပြီးခဲ့သည့် ဓမ္မဝိနယပါဠိတက္ကသိုလ်၌ ကျင်းပ အောင်မြင်ခဲ့သည့် ဒသမ အကြိမ်မြောက် ဝိနည်းဆွေးနွေးပွဲ၌ ရန်ကင်းတောရဆရာတော်ကြီးကိုယ်တော်တိုင်ကြွရောက်ပြီး ယခု စာအုပ်အား အုပ်ရေ ၁၀၀

လှူဒါန်းခဲ့ပါသည်။

မိမိလည်း တစ်အုပ် အလှူခံရရှိခဲ့ပါ၏။

ဤစာတို့အား Scan ဖတ်သော software တို့ကိုပင် အသုံးမပြုပဲ လက်ဖြင့်စာရိုက်ပြီး face book စသည့် social media တို့၌ ရေးသား တင်လှူပူဇော်လိုက်ပါ၏။

ရည်ရွယ်ချက်ကား

1-စာအုပ်မရရှိသော ရဟန်းရှင်လူ အများအား သိရှိ၊ ရရှိစေရန် လည်းကောင်း

2-မိမိကိုယ်တိုင်လည်း စာရိုက်ရင်း စာကြေအောင်ဖတ်ဖြစ်သည့်အလေ့အထ ရစေရန်လည်းကောင်း

3-ဓူတင်သာသနာ ကို ပူဇော်ရန်အတွက်လည်းကောင်း ဖြစ်ပါသည်။

မူလ စာရေးသူ ဆရာတော်ကြီးနှင့်

သက်ဆိုင်သူတို့အား ခွင့်တောင်းဖို့ရာ

အခွင့်မသာခဲ့ပါ။

သာသနာ အတွက်ဖြစ်၍

နားလည်ခွင့်လွှတ်မည်ဟု မျှော်လင့်ပါသည်။

မိမိသူတစ်ပါး အကျိုး

ဆောင်ရွက်နိုင်ကြပါစေ

crd#အရှင်နန္ဒသိရီ

(ရေးတင် ပူဇော်သည်)

All reactions:

22